Билгеле булуынча, быелгы ел – районыбыз оештырылуының 85 еллык юбилее. Аны тантаналы рәвештә декабрь башында билгеләп үтәчәкбез. Шушы уңайдан муниципаль район хакимияте башлангычы белән Балалар сәнәгать мәктәбе муниципаль автономлы өстәмә белем бирү учреждениесе бәйрәм символикасы – эмблемага конкурс игълан итә. Бәйгедә 14 яшьтән өлкәнрәк рәссамнар, дизайнерлар, иҗади хезмәткәрләр союзлары, җәмәгатьчелек берләшмәләре һәм башка кызыксынучы физик һәм юридик шәхесләр яшьләре чикләнелмичә катнаша ала. Эмблема эчтәлекле дә, аны куллану даирәсе чикләнмәгән дә булсын, шул ук вакытта 85 саны булуы да мотлак.

2 октябрь көнне муниципаль район хакимиятенең кече актлар залында Наркотикларның законсыз әйләнеше һәм аларга каршы көрәш буенча комиссиянең чираттагы утырышы булды.
Анда муниципаль район хакимияте башлыгының кадрлар һәм социаль мәсьәләләр буенча урынбасары Геннадий Крюков, наркотикларның законсыз әйләнеше һәм аларга каршы көрәш буенча комиссия сәркәтибе Светлана Шакирова, үзәк дәваханәнең баш табибы Салават Гыйззәтуллин, муниципаль район хакимиятенең яшьләр эшләре, физик культура һәм спорт буенча комитеты рәисе Руслан Бикмөхәммәтов, комитетның әйдәүче белгече Рим Хуҗин, мәгариф бүлеге начальнигы Мәнзүрә Нәбиева, район үзәкләштерелгән китапханәләр системасы директоры Эльвира Газизова, кулланучылар җәмгыяте рәисе Рәиф Сибатов, район эчке эшләр бүлеге начальнигы урынбасары Радик Саяхов, авыл Советы авыл биләмәләре хакимияте башлыклары катнашты.