10-12 декабрьдә Ырынбур шәһәрендә билбау көрәше буенча дөнья кубогы ярышлары узды. Анда 23 илдән 200дән артык баһадир көч сынашты. Русия җыелма командасының 12 әгъзасының дүртесе Башкортстан вәкилләре иде. Шунысы куанычлы, республикабыз гына түгел, илебез данын арттыруга да өлеш кертүче шушы дүртәүнең икесе безнең райондашларыбыз Рөстәм Зыякаев белән Динар Кәлиев булды. Егетләребез үзләренә күрсәтелгән ышанычны тулысынча аклады: Рөстәм Зыякаев 100 килограммнан югарырак категория вәкилләре арасында икенче урынны, Динар Кәлиев исә 82 килограммга кадәрге авырлыктагылар арасында бишенче урынны яулады. Баһадир егетләребезне чираттагы уңышлары белән ихлас тәбрик итәбез һәм яңадан-яңа казанышларга ирешүләрен телибез.