29 ноябрьдә башкалабыз Уфада билбау көрәше буенча республика турниры үтте. Ул дөнья чемпионнары, халыкара класслы спорт мастерлары Рөстәм Арсланов һәм Әлфия Әлимгуҗина призларына оештырылды. Анда 1998-2000 елларда туган үсмер егет һәм кызлар көч сынашты. Бәйгене “Батыр” спорт клубы вәкилләре алып барды.
Анда спортның бу төрен үз иткән яшь райондашларыбыз да уңышлы чыгыш ясап, призлы урыннар яулауга иреште.
45 килограммга кадәр авырлык категориясендә гимназиянең яшь спортчылары Айгиз Сарваев – икенче, Азат Мостафин өченче урынга чыкты. 50 кг.га кадәрге авырлык категориясендә шул ук уку йортыннан Вадим Мөхәммәтов та өченче булды. Яңа Балтачтан Ринат Әбдиев 55 кг. категориясендә – икенче, 60 кг.га кадәргеләр арасында гимназиядән Илсөяр Дәүләтшина өченче урынга лаек булды. Иске Бәширдән Размик Суроян, гимназиядән Лиана Гәрәева һәм Үрнәктән Алмаз Габдиев 65, 70 һәм 75 килограммга кадәрге авырлык категорияләрендә җиңүчеләр пьедесталының өченче баскычын биләделәр. Аларны бу мәртәбәле бәйгегә тренерлар Илнур Рәфит улы Галишин һәм Регина Рәмзил кызы Баһманова әзерләде.
Җиңүче-призерларга “Батыр” спорт клубының Мактау грамоталары һәм медальләре тапшырылды.