7 майда Илеш районының Югары Яркәй авылында спортның көрәш төре буенча ачык турнир үтте. Ике тапкыр Советлар Союзы Герое Муса Гайсә улы Гәрәев истәлегенә һәм Бөек Җиңүнең 70 еллык бәйрәме уңаеннан үткәрелгән бу бәйгедә республиканың төрле шәһәр-районнарыннан 127 спортчыны берләштергән 10 команда катнашты. Безнең район данын 12 егетебез яклады. 80 килограмм авырлык категориясендәге егетләр арасында көч сынашкан Рөстәм Батыргәрәев икенче урынга лаек булды. 1996 елда дөньяга килгән һәм аннан да өлкәнрәк ир-егетләр арасында 60 кг. авырлык категориясендә Айдар Кодаяров – өченче, 90 кг. авырлыктагылардан Илнур Галишин – икенче, 90 килограммнан авырраклар арасында Рөстәм Исламов беренче урынга чыкты һәм бәйге чемпионы исеменә лаек булды. Бу көнне шулай команданың уңышлы чыгыш ясавына Руслан Хәмәев, Марат Хантимеров, Размик Суроян, Финат Хәмәтшин, Ильяс Махъянов, Булат Бүләков, Динар Кәлиев, Илнур Нәҗметдинов лаеклы өлеш керттеләр. Җиңүчеләр һәм призлы урыннар яулаучыларга Мактау грамоталары, медальләр һәм акчалата бүләкләр тапшырылды.