Балаларның җәйге ялы

Җәйге каникул көннәрен укучы балалар түземсезлек белән көтеп ала. Берәүләр әти-әниләре белән төрле җирләрдә сәяхәттә йөри, савыктыру-ял лагерьларында ял итә. Әмма күпчелек авылында гына үткәрә: су коена, урман- яланнарда җиләк-җимеш җыя — кыскасы, табигать кочагында кинәнә.
Иске Сөрмәт авылында яшәүче өченче һәм дүртенче сыйныфларны тәмамлаган Рәмил Гәрәев белән Данил Әлмиев та ял вакытларын бушка уздырмый. Авылның яшь үзешчәннәре алар. Мәдәният йорты директоры Рузилә Нәфыйкова олысы-кичесен мәдәни чараларга-түгәрәкләргә җәлеп итә. 9 сыйныфны тәмамлаган улы Рузил аның төп ярдәмчесе: сәхнә техникасы белән дә идарә итә, малайлар һәм кызларны биергә дә өйрәтә. Рамил белән Данилны да ул өйрәтеп сәхнәгә чыгарды. Аларның чыгышын савучыларның район ярышында катнашучылар да яратып кабул итте.