Күптән түгел Чакмагыш гимназиясе укучылары Кырмыскалы районының Прибельский авылында үткән “Математика каруселе” дип аталган ачык зона турнирында катнашты. Аның барышында сәләтле балаларның интеллектуаль һәм социаль ихтыяҗларын канәгатьләндерү, яңа педагогик һәм социаль технологияләрне куллану, интеллектуаль иҗат кыйммәтләрен арттыру максат итеп куелды. “Математика каруселе” турнирында укучылар әлеге фән буенча олимпиада биремнәрен чиште. Бәйгедә Эльвина Әхмәтгәрәева (10б сыйныф), Алсу Әхмәдиева (10б), Диана Мөхәммәтҗанова (9в), Рената Гобәйдуллина (9в), Булат Дәүләтов (8в), Азалия Сәлимова (8а), Регина Кәримова (7в), Галия Янбухтина (7а), Элиза Хуҗина (6б), Радмир Исхаков (6б), Арина Вәлиева (5в), Ильяс Вахитов (5а) катнашты. Командалар арасында өлкән (9-10 сыйныфлар) һәм кече (5-6 сыйныф) лигалар командалары беренче урыннарны яулады. Җиңүчеләргә дипломнар һәм истәлекле бүләкләр тапшырылды.
Турнирда катнашыр өчен командаларны математика укытучылары Гөлнара Вахитова, Гөлнара Латыйпова, Резида Заһидуллина, Рәфага Такиева әзерләде. Гимназия укучыларының тәүге җиңүендә аларның салган өлеше зур.

Әзерләде: Лиана Ханмурзина.