Илебез иминлеге ышанычлы кулларда



23 февраль Русиянең данлы көннәре тарихына олы бәйрәм – Ватанны саклаучылар көне булып уелып калды. Төрле елларда Ватаныбызның азатлыгы һәм бәйсезлеге өчен кулларына корал алып көрәшкән, бүгенге тыныч тормышыбызны тәэмин итү хакына яу кырларында гомерләрен корбан иткән ата-бабаларыбыз, абый-апаларыбызның тиңдәшсез каһарманлыгы тарих битләренә алтын хәрефләр белән уелган. Илебездә революцион үзгәрешләр чорында төрле яклардан ябырылган чит ил баскынчыларыннан, Бөек Ватан сугышы елларында фашист илбасарларыннан коткарып калган кыю яугирләрнең данлы эшләрен бүген Кораллы Көчләр сафларында хезмәт итүче ватандашларыбыз лаеклы дәвам итә, Ватаныбыз мәнфәгатьләрен яклый.
Горурланырлык үткәннәргә ия Русия Федерациясе Кораллы Көчләре бүген дә илебез иминлеге сагында уяу тора. Катлаулы халыкара шартларда Ватаныбыз иминлеген тәэмин итәр өчен ныклылык, фидакарьлек, каһарманлык таләп ителгән мәлләрдә дә аларның биргән изге антларына тугрылык саклаячакларына ныклы ышанабыз. Төрле елларда илебез иминлеген яклаган, бүген дә шушы изге эштә үзләрен аямаган Туган ил сакчыларыбыз белән лаеклы горурланабыз һәм аларга чиксез рәхмәтләребезне белдерәбез.
Хөрмәтле Бөек Ватан сугышы ветераннарын, яугир-интернационалчыларны, төрле кораллы бәхәсләрдә илебез мәнфәгатьләрен саклаган, Ватан сугышында изге бурычларын төрле гаскәри частьларда үтәгән һәм, әлбәттә, бүген дә Кораллы Көчләр сафларында уяулык күрсәтеп хезмәт итүче хәрби якташларыбызны, каһарман яугирләрне ихлас йөрәктән Ватанны саклаучылар көне белән тәбрик итәм! Һәрбарчагызга ныклы сәламәтлек, бәхет, иминлек, Ватаныбыз мәнфәгатьләрен яклау хакына җиңел булмаган фидакарь хезмәтегездә уңышлар телим.