“Бердәм Русия” сәяси партиясенең быел июньнән тормышка ашырыла башлаган “Реаль эшләр” проекты районыбыздагы берничә авыл биләмәсендә җәелдерелде, дип белдергән идек инде. Чакмагыш авылында Җиңү паркын модернизацияләү максатында башкарыласы эшләрнең смета бәясе 700 мең сумга баса. Шушы эшне “Бердәм Русия” тулысынча үзе финансларга вәгъдә итә. Җиңү паркындагы Бөек Ватан сугышы яугирләре хөрмәтенә куелган стеллага ныклы ремонт һәм кайбер өстәмәләр кертү максатында тиздән анда эш кайнаячак. Район үзәгендә яшәүчеләр генә түгел, ә килгән кунаклар өчен дә кадерле һәм якын истәлекле шушы җәмәгать урыны матурланып та, төзекләнеп тә калыр, дип өметләнәбез. Тарихыбызга һәм киләчәгебезгә битараф булмаган, туган җирен бирелеп яраткан шәхесләр тәрбияләүдә әлеге истәлекле паркның да әһәмияте бәхәссез.