Якшәмбе көнне Туймазы шәһәрендә шайбалы хоккей буенча ачык турнир үтте. Яз һәм хезмәт бәйрәменә багышланган бу спорт чарасында Башкортстан Республикасы муниципаль район һәм шәһәр округларының җыелма командалары катнашты. Шайбалы хоккей буенча ачык турнирда безнең район командасы да чыгыш ясады һәм нәтиҗәле уен күрсәтте. Һәвәскәр уенчылардан оештырылган командалар арасында Чакмагыш муниципаль район хакимияте командасы II урынга лаек булды. Iнче урынны Туймазы районы хакимияте командасы яулады. III урында Благовар район хакимияте командасы, IV урынга әлшәйлеләр чыкты.
Җиңүчеләргә Туймазы муниципаль район хакимиятенең Кубоклары һәм Мактау кәгазләре, медальләр тапшырылды. Турнирның иң яхшы сакчысы дип безнең район командасыннан Камил Фәхретдинов танылды. Камил Фәрит улы 85 санлы һөнәрчелек лицеенда производствога өйрәтү мастеры булып эшли.