Агымдагы елның май башында төбәкләрдә “Изгелек кәрзине” социаль проекты игълан ителгән иде. Аның барышында матди яктан авырлык кичергән ярдәмгә мохтаҗ гаиләләргә азык-төлекләтә ярдәм күрсәтү күз уңында тотыла.
“Изгелек кәрзине”нә сәүдә йортларында, кибетләрдә азык-төлек сатып алганда үзе теләгән ризыкны хәер итеп, махсус урнаштырылган тартмаларга салып калдырырга була. Безнең районда “Изгелек кәрзине” “Магнит” сәүдә йортында урнаштырылды. Чарага байтак райондашларыбыз кушылды. Бу тартмага озак сакланучан азык-төлек: тукмач, көнбагыш мае, төрле ярмалар, боткалар, чәй, сут, печенье һәм консервалар салынды. 14 июльдә волонтерлар әлеге тартмалардан азык-төлек белән тутырылган сигез пакет җыйнап, районның төрле авылларында яшәүче мохтаҗ гаиләләргә тапшырдылар.
Шунысын да әйтергә кирәк, бу беренче генә тапкыр түгел. 28 июньдә дә шулай ук азык-төлек белән тутырылган 14 пакет таратылган иде.
Бу проектта катнашырга теләкләре булган кешеләргә әле дә соң түгел, ул июль аеның соңгы көненә кадәр дәвам итәчәк. Изгелек эшләргә ашыгыйк, райондашлар!